نائب امیر جماعت اسلامی، ناظم اجتماعِ عام لیاقت بلوچ نے مینارِ پاکستان گریٹر اقبال پارک میں صفائی اور بحالی کے کاموں کا جائزہ لیا، تحریکِ محنت، لاہور عملہ صفائی اور ہنرمندوں کی ٹیموں کے ساتھ میٹنگ کی. صفائی بحالی کا کام 90 فیصد مکمل ہوگیا ہے، اتوار کو بحالی کے کام کی مکمل تکمیل کے بعد گریٹر اقبال پی ایچ اے حکام کے حوالے کردیا جائے گا. لیاقت بلوچ نے مینارِ پاکستان صفائی بحالی مرکزی کیمپ میں کارکنان سے خطاب کرتے ہوئے کہا کہ اجتماعِ عام کے انتظامات میں انتھک محنت کی. اِسی طرح پی ایچ اے، پولیس، ٹریفک پولیس، لیڈی پولیس، انتظامیہ، پاکستان ریلوے، واپڈا (لیسکو)، ایل ڈبلیو ایم اے کا بھرپور تعاون حاصل رہا. جماعتِ اسلامی نے پُرامن، شائستہ، مہذب آئینی جمہوری جذبات کے اظہار کے ساتھ فقیدالمثال اجتماعِ عام منعقد کیا. امیر جماعتِ اسلامی پاکستان حافظ نعیم الرحمن کی ولولہ انگیز قیادت اور “بدل دو نظام” کا لائحہ عمل ہر محاذ پر پذیرائی حاصل کررہا ہے.
لیاقت بلوچ نے صحافیوں سے گفتگو کرتے ہوئے کہا کہ سیاسی بحرانوں کو انتقام کی آگ سے مزید گھمبیر نہ بنایا جائے. قومی قیادت ذاتی، گروہی، پارٹی مفادات کی بجائے قومی سیاسی جمہوری آئینی استحکام کی فکر کرے. ملک پر مسلط نظام آئین، جمہوریت، آزاد عدلیہ، بنیادی انسانی حقوق کے لیے جان لیوا بن گیا ہے. آئینِ پاکستان متفقہ قومی دستاویز ہے، بدنیتی پر مبنی آئینی ترامیم مضبوط قومی عمرانی معاہدہ کو متنازعہ بنارہا ہے. خطہ میں پاکستان، ایران اور افغانستان کو سیاسی، علاقائی، سفارتی، تجارتی تعلقات کو مضبوط بنانا ہوگا. افغانستان کی عارضی حکومت افغانستان کو امریکہ، اسرائیل، انڈیا کے مفادات کی چراگاہ نہ بنائے. پاکستان اور افغانستان کے تعلقات کی پائیداری دونوں ملکوں کے عوام کی بنیادی ضرورت ہے.
لیاقت بلوچ نے کہا کہ انڈیا حسینہ واجد کو بنگلہ دیش کے حوالے کرے. ایک ملک میں جرائم کی بنیاد پر سزایافتہ فرد کو دوسرا ملک تحفظ دے تو یہ ناانصافی، ظلم اور انسان دشمنی ہے. انڈین قیادت اپنی غلطیوں کو تسلیم کرے. سارک ممالک انڈیا کی بالادستی قبول نہیں کرسکتے. خطہ میں امن اور ترقی کا دارومدار انڈیا کے رویے پر ہے. انڈین حکومت پاکستان اور بنگلہ دیش کیساتھ دشمنی پر مبنی اپنا رویہ درست کرے اور دونوں ممالک کیساتھ تعلقات بحال کرے، طویل مدت سے زیرِ التواء مسئلہ کشمیر کے حل سے متعلق اقوامِ متحدہ کی قراردادوں پر عمل کرے، کشمیریوں کو حقِ خودارادیت دیا جائے.
لیاقت بلوچ نے کہا کہ ایران سے گیس پائپ لائن منصوبہ پر اب پاکستان کو عمل کردینا چاہیے. ایران سے گیس پائپ لائن منصوبہ کی تکمیل پاکستان کے لیے ناگزیر ہے
