پنجاب حکومت نے ٹرانسپورٹ کھولنے کا فیصلہ وفاقی حکومت کی اجازت سے مشروط کر دیا ۔ تفصیلات کے مطابق عید سے قبل ٹرانسپورٹ کھولنے کے معاملہ پر پنجاب حکومت نے اپنا فیصلہ سنا دیا ہے اور اسے وفاقی حکومت کی اجازت سے مشروط کر لیا ہے۔ ذرائع کا کہنا ہے کہ پنجاب حکومت نے ٹرانسپورٹ کھولنے کا معاملہ نیشنل کمانڈ کونسل پر چھوڑ دیا ہے۔
بتایا گیا ہے کہ ٹرانسپورٹ کو عید سے قبل پردیسیوں کی واپسی کیلئے کھولا جا سکتا ہے تاہم اس سے متعلق ایس او پیز تشکیل دیئے جا رہے ہیں توقع کی جا رہی ہے کہ فیصلہ ایک سے دو روز میں کر لیا جائے گا۔ جبکہ لاہور شہر میں پھنسے پردیسیوں کی گھر واپسی کیلئے ٹرانسپورٹ کھولنے کی تجویز پنجاب حکومت کو پیش کر دی گئی تھی ، تجویز میں کہا گیا تھا کہ مسافر گاڑیوں میں ایس او پیز پر عمل کیا جائے گا۔
مسافر گاڑیوں میں بیٹھنے سے پہلے ہی ماسک، گلوز پہنیں گے اور سینیٹائزر کا استعمال بھی یقینی بنائیں گےایک دوسرے سے ہاتھ ملانے سے گریز کیا جائے گا جبکہ کھانسی آنے کی صورت میں ٹشوکا استعمال کیا جائے گا۔ تجویز میں ٹرانسپورٹ کیلئے بھی احتیاطی تدابیر تجویز کی گئیں ہیں، جس میں کہا گیا ہے کہ ٹرانسپورٹر گاڑیوں میں جراثیم کش سپرے ضرور کرائیں گے۔
گاڑی میں اے سی ( ایئر کنڈیشن ) نہیں چلایا جا سکے گا۔ جبکہ گاڑیوں کو مسافروں سے بھرا نہیں جائے گا، ان میں محدود فاصلے کو یقینی بنایا جائے گا۔ تاہم ٹرانسپورٹ کھولنے کا حتمی فیصلہ وزیراعلیٰ پنجاب عثمان بزدار کی مشاورت سے کیا جائے گا۔ عید سے قبل ہی پردیسیوں کی گھر واپسی کیلئے تجویز وزیراعلیٰ پنجاب کو بھیجوا دی گئی ہے۔
