انیلہ ایاز چوہدری
پاکستان کی سیاسی تاریخ میں چند ہی خاندان ایسے ہیں جو دہائیوں سے سیاست میں ہے مگر عوام کے ساتھ اپنا رشتہ نبھانے والے بہت کم ہیں‘ چوہدری ظہور الہی کا خاندان ایک ایسا خاندان ہے جو عشروں سے عوام کے ساتھ اپنا تعلق اور یہ رشتہ نبھا رہا ہے‘ عوام کے لیے ہی عوام کی حمائت سے ہی کئی بار بلکہ درجنوں بار اقتدار تک بھی پہنچا ہے‘ عوام کے ساتھ اپنے تعلق کا سکہ جمائے ہوئے ہے‘ اس خاندان نے ہمیشہ اقتدار کے ایوانوں میں عوام کی بھلائی کے لیے قانون سازی کی اور اس میں حصہ لیا‘ یہی وجہ ہے کہ عوام آج بھی انہیں اپنے سر کا تاج سمجھتے ہیں اور چوہدری ظہور الہی کا خاندان اللہ کے کرم سے سیاست میں اپنا اثر و رسوخ برقرار رکھے ہوئے ہے‘ گجرات کے چوہدری خاندان کی سیاست کا ایک ایسا باب ہے‘ جو چوہدری ظہور الٰہی شہید کی جرات مندانہ جدوجہد عوامی خدمت سے شروع ہو کر آج ان کی تیسری نسل کے ذریعے جاری ہے‘ وفاق میں چوہدری ظہور الہی کے پوتے چوہدری سالک حسین کی وزارت کے ذریعے عوام کی خدمت اور بھلائی کے لیے مصروف عمل ہے‘ یہ سفر محض انتخابی کامیابیوں کی داستان نہیں‘ بلکہ پنجاب کی روایتی، قبائلی اور مفاہمتی سیاست کے بدلتے ہوئے رنگوں کی یکتا عکاسی بھی کرتا ہے۔ اس سیاسی میدان کے ذریعے خدمت کی عوامی سلطنت کی بنیاد چوہدری ظہور الٰہی نے رکھی‘ قومی سطح کے قد آور سیاست دان بننے کا ان کا سفر غیر معمولی استقامت سے عبارت ہے۔ ایوب خان کے دور میں نواب آف کالا باغ کی مخالفت ہو یا ذوالفقار علی بھٹو کے دور میں قید و بند کی صعوبتیں اور حتی کہ ناجائز مقدمات اورجائیدادوں کی ضبطگی، چوہدری ظہور الٰہی نے یہ ناقابل بیان جبر کمال حوصلے سے برداشت کیا اور حکومتیں اور سیاسی حریف تیر آزماتے رہے اور چوہدری ظہور الہی جگر آزماتے رہے مگر کبھی اصولوں پر سمجھوتہ نہیں کیا‘ انہوں نے گجرات میں بے مثال فلاح و بہبود کی‘ تعلیمی اداروں، ہسپتالوں اور بنیادی ڈھانچے کی تعمیر کے ساتھ ساتھ علاقے کے لوگوں کے لیے روزگار کے دروازے کھولے۔ ان کی سیاست میں ذاتی تعلق، وضع داری اور مخالفین کے لیے بھی احترام کا عنصر نمایاں تھا، چوہدری ظہور الٰہی کی شہادت کے بعد خاندان کی سیاسی باگ ڈور کا علم ان کے صاحبزادے چوہدری شجاعت حسین نے سنبھالا‘ اور اس دوسری نسل نے چوہدری خاندان کو محض ایک علاقائی قوت سے نکال کر ملکی سیاست کا ”کنگ میکر” بنا دیا۔چوہدری شجاعت حسین کی ”مٹی پاؤ” اور مفاہمت کی سیاست نے انہیں وفاقی وزارتوں سے لے کر اسلامی جمہوری پاکستان کے وزارتِ عظمیٰ کے منصب تک پہنچایا، جبکہ چوہدری پرویز الٰہی نے بلدیہ سے لے کر اسپیکر اسمبلی اور وزیرِ اعلیٰ پنجاب (2002ء تا 2007ء) کے دوران صوبے میں ترقیاتی کاموں کا جال بچھا دیا‘ریسکیو 1122 جیسے عوامی فلاحی منصوبوں اور تعلیم و صحت کے شعبوں میں انمٹ نقوش چھوڑے ہیں‘ اس دور کی سب سے بڑی خوبی خاندانی اتحاد تھا۔ ”ایک ہی گھر، ایک ہی فیصلہ” کے اصول نے انہیں پنجاب کی سیاست میں ناقابلِ تسخیر بنائے رکھا۔تاہم، وقت کے ساتھ ساتھ جب تیسری نسل نے سیاسی میدان میں قدم رکھا تو بدلتے ہوئے سیاسی حالات اور نظریاتی اختلافات نے اس مضبوط قلعے میں دراڑیں ڈال دیں۔ مونس الٰہی اور چوہدری سالک حسین کے سیاسی راستے جدا ہوئے تو دہائیوں پرانا خاندانی اتحاد دو حصوں میں بٹ گیا۔ ایک دھڑا پاکستان تحریکِ انصاف کے ساتھ کھڑا ہوا تو دوسرے نے مسلم لیگ (ق) کی روایتی سیاست کو برقرار رکھتے ہوئے وفاقی اتحاد کا حصہ بننے کو ترجیح دی۔ آج تک اسی دی ہوئی زبان کی لاج رکھے ہوئے ہیں‘آج اس خاندان کی تیسری نسل کے نمائندے چوہدری سالک حسین وفاقی وزیر برائے سمندر پار پاکستانی و ترقی انسانی وسائل کی حیثیت سے خدمات انجام دے رہے ہیں۔ انہوں نے اپنے دادا اور والد کی روایات کو جدید تقاضوں سے ہم آہنگ کرنے کی کوشش کی ہے۔ سمندر پار پاکستانیوں کے جائیداد کے تنازعات کے حل کے لیے خصوصی عدالتوں کے قیام کا بل ہو یا خلیجی ممالک، جاپان اور جنوبی کوریا کے ساتھ پاکستانی ہنرمند افراد کے لیے روزگار کے نئے معاہدے، سالک حسین نے عملی قانون سازی اور ادارہ جاتی اصلاحات پر توجہ مرکوز رکھی ہے۔ حالیہ دنوں میں پنجاب حکومت کے ساتھ ترقیاتی فنڈز اور گورننس کے معاملات پر ان کا دوٹوک موقف اس بات کی غمازی کرتا ہے کہ چوہدری خاندان کی نئی نسل بھی اپنے حلقے کے مفادات اور سیاسی وقار پر سمجھوتہ کرنے کو تیار نہیں۔ مجموعی طور پر دیکھا جائے تو چوہدری ظہور الٰہی سے لے کر چوہدری سالک حسین تک کا یہ سفر پنجاب کی خاندانی سیاست کا ایک مکمل استعارہ ہے۔ اس خاندان کی اصل طاقت ہمیشہ عوامی رابطہ، حلقے کی خدمت اور مشکل وقت میں حلیفوں کا ساتھ نبھانا رہی ہے۔ اگرچہ خاندانی تقسیم نے ان کی اجتماعی سیاسی قوت کو کسی حد تک متاثر ضرور کیا ہے، لیکن گجرات کی مٹی سے جڑی ان کی جڑیں اور خدمتِ خلق کی روایت آج بھی انہیں ملکی سیاست کا ایک اہم اور ناگزیر کردار بنائے ہوئے ہے
