پاکستان مسلم لیگ ن کے صدر محمد نواز شریف اور وزیر اعلیٰ پنجاب مریم نواز شریف سے متحدہ عرب امارات کے سفیر حماد عبید ابراہیم سالم الزعابی نے ملاقات کی۔ ملاقات میں پاکستان اور یو اے ای کے درمیان تعاون کو نئی بلندیوں تک لے جانے پر اتفاق کیا گیا۔ صدر مسلم لیگ ن اور وزیراعلیٰ پنجاب نے متحدہ عرب امارات کی دور اندیش قیادت، خصوصاً صدر شیخ محمد بن زاید النہیان کی قیادت کو خراج تحسین پیش کیا۔محمد نواز شریف نے کہا کہ پاکستان اور یو اے ای کا رشتہ محض سفارتی نہیں بلکہ دلوں میں بسا بندھن ہے جو وقت اور حالات کی آزمائشوں میں ہمیشہ سرخرو رہا ہے۔ مریم نواز شریف نے تعلیم، تحقیق، سائنس، ماحولیات اور پائیدار ترقی کے میدان میں تعاون کو مزید وسعت دینے کی خواہش ظاہر کی۔ انہوں نے پنجاب میں تعلیم، صحت، انفراسٹرکچر اور قابلِ تجدید توانائی کے شعبوں میں جدت کی جانب پیش رفت کا بھی ذکر کیا۔ مریم نواز شریف نے پاکستان اور یو اے ای کے درمیان سرکاری و سفارتی پاسپورٹ ہولڈرز کے لیے ویزا فری انٹری کی اجازت کو قابلِ تحسین قرار دیا۔ وزیر اعلیٰ پنجاب نے یو اے ای کے سرمایہ کاروں، اداروں اور کاروباری برادری کو پنجاب میں سرمایہ کاری کی دعوت دی اور پنجاب کو سرمایہ کاری کے لیے بزنس فرینڈلی انوائرمنٹ قرار دیا۔
