پارلیمنٹ ہاؤس اور پارلیمنٹ لاجز کے سامنے شاہراہ جمہوریت پر یادگار دستور اور باغ دستور کا افتتاح کر دیا گیا۔
اس موقع پر اسپیکر قومی اسمبلی راجہ پرویز اشرف نے یادگار دستور کی افتتاحی تقریب سے خطاب کرتے ہوئے کہا کہ یادگار دستور کی تعمیر کا مقصد عوام کو اپنے پارلیمان اور آئین سے جوڑے رکھنا ہے۔
انکا کہنا تھا کہ آئین پاکستان ہماری عظمت اور توقیر کا نشان ہے۔ عوام کے لیے یادگار دستور اور باغ دستور تحفہ ہے۔
راجہ پرویز اشرف نے کہا کہ آئین پاکستان کی تشکیل شہید ذوالفقارعلی بھٹو کا قوم پر بڑا احسان ہے۔ آئین پاکستان ہم سب کے لیے مشعل راہ ہے۔ شہید ذوالفقارعلی بھٹو نے قوم کو متفقہ آئین دیا۔
اسپیکر قومی اسمبلی نے کہا کہ شاہراہ دستو پر قائم یادگار دستور ہر وقت اراکین پارلیمنٹ کی نظر کے سامنے ہوگی۔ یادگار دستور اور باغ دستور عوام کیلیےایک تفریحی مقام کے طور پر کھلا رہے گا۔
انکا کہنا تھا کہ یادگار دستور کا دورہ کرنے والے افراد آئین سے متعلق آگاہی حاصل کر سکیں گے۔ یادگار دستور اور باغ دستور کی تعمیر میں حصہ لینے والے تمام افراد ہمارے ہیرو ہیں۔
راجہ پرویز اشرف نے کہا کہ پاکستان کی 16ویں قومی اسمبلی وجود میں آنے جا رہی ہے۔ انہوں نے 16ویں قومی اسمبلی کی کامیابی کے لیے نیک خواہشات کا اظہار کیا۔
