اسلام آباد——-
ڈائریکٹر امورِ خارجہ جماعت اسلامی پاکستان، آصف لقمان قاضی نے کہا ہے کہ جماعت اسلامی کے مرکز منصورہ میں دنیا بھر کی اسلامی تحریکوں کا ایک مشترکہ سیکرٹریٹ قائم کیا جائے گا۔ اسلامی تحریکیں اس سیکرٹریٹ میں مل کر لائحہ عمل تیار کریں گی، اور تین ماہ کے اندر یہ سیکرٹریٹ فعال ہو جائے گا۔ ان خیالات کا اظہار انھوںنے ڈپٹی سیکرٹری جنرل جماعت اسلامی پاکستان فراست شاہ اور امیر جماعت اسلامی اسلام آباد نصراللہ رندھاوا کے ہمراہ پریس کانفرنس کرتے ہوئے کیا ۔
آصف لقمان قاضی نے کہا کہ اجتماعِ عام میں لاکھوں افراد نے شرکت کی۔ اجتماعِ عام کے بعد ایک بین الاقوامی کانفرنس منعقد کی گئی، جس میں 42 ممالک کے نمائندوں نے شرکت کی۔ اسلامی تحریکوں کے نمائندوں نے امتِ مسلمہ کی نمائندگی کی۔ یورپ، ایشیا، مشرقِ وسطیٰ اور افریقہ کی مسلم تحریکوں کے نمائندہ وفود پاکستان آئے۔ صمود فلوٹیلا کی قیادت کرنے والے بھی اس اجتماع میں شریک ہوئے۔ مینارِ پاکستان پر فلسطین کے ساتھ یکجہتی کا اظہار نہایت اہم تھا۔ 23 مارچ 1940ئ کو قراردادِ پاکستان کی منظوری کے ساتھ فلسطین کی قرارداد بھی منظور کی گئی تھی۔ اجتماعِ عام پاکستان کے لیے پبلک ڈپلومیسی کا ذریعہ بھی ثابت ہوا۔
صحافیوں کے سوالات کے جواب دیتے ہوئے انہوں نے کہا کہ جماعت اسلامی کا کام ہمہ جہت ہے۔ انتخابات میں حصہ لینا جماعت اسلامی کے کام کا ایک پہلو ہے۔ اجتماعِ عام میں تمام اسلامی تحریکوں نے جماعت اسلامی کی مرکزیت کو تسلیم کیا۔ اسرائیل نے دو لاکھ فلسطینیوں کو شہید کیا، لیکن فتح فلسطین کی ہوئی۔ سیکرٹریٹ کے قیام کے لیے تین ماہ کا وقت مقرر کیا گیا ہے۔ مغربی ممالک کی جانب سے دوہرا معیار اپنایا گیا ہے، تاہم مغربی عوام نے فلسطینیوں کے حق میں لاکھوں کے جلوس نکالے۔ دنیا بھر میں فلسطینیوں کے حق میں رائے عامہ قائم ہو رہی ہے۔
