ملک کے شمالی اور پہاڑی علاقوں میں شدید بارشوں اور کلاؤڈ برسٹ کے باعث مختلف علاقوں میں تباہی مچ گئی، ندی نالوں میں طغیانی، سیلابی ریلے، زمین کا کٹاؤ اور رابطہ سڑکوں کی بندش نے نظامِ زندگی مفلوج کر دیا۔
گلگت بلتستان کے ضلع غذر میں طوفانی بارشوں کے باعث ندی نالے بپھر گئے، اشکومن روڈ آٹھ مقامات پر بند ہوگئی اور ایک گاڑی سیلابی ریلے میں بہہ گئی۔
اسکردو میں کلاؤڈ برسٹ کے بعد برگے اور رگیول نالے میں شدید طغیانی آئی، اور سیلابی پانی دیہات کی جانب بڑھ رہا ہے، جس کے باعث مقامی افراد نے محفوظ مقامات کی جانب نقل مکانی شروع کر دی ہے۔
غذر کی تحصیل گوپس کے گاؤں خلتی میں 7 افراد سیلاب کی زد میں آگئے جن میں سے خاتون سمیت 3 افراد جان کی بازی ہا ر گئے۔ دیامر میں دو افراد ریلوں میں بہہ گئے، تودے کی زد میں آ کر ایک بچہ زخمی ہوگیا۔ تھوئی کےعلاقے میں بھی سیلاب کی زد میں آ کر ایک شخص لاپتہ ہوگیا۔
ضلع کے مختلف علاقوں میں بارش اور سیلاب کی تباہی سے متعدد رابط سڑکیں بند ہوگئیں، اشکومن میں سیلاب کے باعث دریائے اشکومن میں طغیانی ہے، نشیبی علاقوں کے لوگوں کو محفوظ مقامات پر منتقل کیا جارہا ہے۔
ادھر، اسکردو ہی میں کے ٹو مہم جوئی کے دوران ایک امریکی کوہ پیما پہاڑی تودے کی زد میں آکر شدید زخمی ہوگیا، جسے پاک فوج کے ہیلی کاپٹر مشن نے بروقت ریسکیو کرکے اسپتال منتقل کیا۔
طوفانی بارشوں سے آزاد کشمیر میں بھی بڑے پیمانے پر تباہی
طوفانی بارشوں نے آزاد کشمیر میں بھی بڑے پیمانے پر تباہی مچائی۔ باغ میں سیاحوں کی ایک گاڑی پانی میں بہہ گئی، تاہم تمام سیاحوں کو بحفاظت نکال لیا گیا۔
مظفرآباد کی تحصیل نصیرآباد میں کلاؤڈ برسٹ کے باعث سچہ نالے میں طغیانی نے مکان کو لپیٹ میں لے لیا، ایک ہی خاندان کے 6 افراد جاں بحق ہوگئے، مچھارہ نالے پر بنا پل پانی میں بہہ گیا، جبکہ جہلم ویلی کے جیاں نالے میں طغیانی سے 4 دکانیں بھی بہہ گئیں۔
وادی نیلم میں بھی لینڈ سلائیڈنگ سے متعدد سیاح پھنس گئے، سیاحوں کو ریسکیو کرنے کےلیے آپریشن جاری ہے۔
باغ شہر اور گرد و نواح میں ندی نالوں کی طغیانی نے معمولات زندگی منجمد کر دیے ہیں۔ نالہ ماہل اور نالہ ملوانی میں پانی کے بہاؤ سے زمین کا کٹاؤ شدید ہو گیا ہے۔
ادھر ایبٹ آباد میں برساتی نالا عبور کرتے ہوئے میٹرک کی طالبہ برساتی نالے میں ڈوب کرجاں بحق ہو گئی، دوسری طالبہ اور ٹیچر زخمی ہوگئیں۔
محکمہ موسمیات نے آئندہ چند روز کے دوران مزید بارشوں کی پیش گوئی کی ہے، جبکہ ضلعی انتظامیہ اور ریسکیو ادارے ہنگامی بنیادوں پر امدادی کارروائیاں جاری رکھے ہوئے ہیں۔
