پاکستان کی تاریخ میں چند شخصیات ایسی ہیں جنھوں نے اپنی بصیرت، فراست اور کردار کے ذریعے قوم کے دلوں میں ہمیشہ کے لیے جگہ بنا لی۔ ان ہی عظیم شخصیات میں محترمہ فاطمہ جناح کا نام نمایاں ہے۔ قوم انھیں محبت اور احترام سے ’مادرِ ملت‘ کے لقب سے یاد کرتی ہے۔ انھوں نے نہ صرف تحریکِ پاکستان میں اہم کردار ادا کیا بلکہ قیامِ پاکستان کے بعد بھی تعمیر و استحکام پاکستان، جمہوریت، قومی یکجہتی اور عوامی حقوق کے لیے جدوجہد جاری رکھی۔ ان کی زندگی خدمت، ایثار، دیانت اور عزم و استقلال کی روشن مثال ہے۔ فاطمہ جناح نے اپنے عزم اور محنت سے یہ ثابت کیا کہ خواتین ہر شعبے میں کامیابی حاصل کر سکتی ہیں۔
فاطمہ جناح کی زندگی کا ایک اہم پہلو ان کا اپنے بھائی محمد علی جناح کے ساتھ غیر معمولی تعلق تھا۔ جب جناح صاحب کی اہلیہ کا انتقال ہوا تو فاطمہ جناح نے ان کا بھرپور ساتھ دیا۔ وہ نہ صرف ایک بہن بلکہ ایک قابلِ اعتماد مشیر اور رفیقِ کار بھی تھیں۔ تحریکِ پاکستان کے دوران انھوں نے مسلم خواتین کو منظم کرنے، ان میں سیاسی شعور بیدار کرنے اور انھیں قومی جدوجہد میں شریک کرنے کے لیے نمایاں خدمات انجام دیں۔ تحریکِ پاکستان میں فاطمہ جناح کا کردار انتہائی اہم تھا۔ وہ مختلف شہروں کا دورہ کرتیں، خواتین کے اجتماعات سے خطاب کرتیں اور مسلمانوں کو ایک الگ وطن کے قیام کی ضرورت سے آگاہ کرتیں۔ ان کی تقاریر میں اعتماد، خلوص اور قومی جذبہ نمایاں ہوتا تھا
