نینشل کمانڈ اینڈ آپریشن سنٹر (این سی او سی) نے ملک میں بڑھتے ہوئے کورونا کے مثبت کیسز پر تشویش کا اظہار کیا ہے۔ اسلام آباد، خیبرپختونخوا اور پنجاب کے مختلف علاقوں میں لاک ڈاؤن کا دائرہ کار بڑھانے پر غور کیا جا رہا ہے۔
تفصیلات کے مطابق وفاقی وزیر منصوبہ بندی اسد عمر کی زیر صدارت این سی او سی کا اجلاس ہوا، اجلاس میں بڑھتے ہوئے کورونا کیسز پر تشویش کا اظہار کرتے ہوئے کہا گیا کہ ملک بھر میں کورونا کی تیسری لہر سنگین صورتحال اختیار کرتی جا رہی ہے۔
این سی او سی اعلامیہ کے مطابق ملک بھر میں کورونا کیسز میں اضافے کی شرح 5 سے 6 فیصد ہو چکی ہے، تمام بڑے شہروں میں ایس او پیز پر سختی سے عملدرآمد کروانے کی ہدایات جاری کی گئی ہے، پنجاب کے کورونا کے بڑھتے کیسز باعث تشویش ہیں، پنجاب، اسلام آباد، کے پی کے اور آزاد کشمیر میں چند علاقوں میں زیادہ کیسز سامنے آ رہے ہیں۔
این سی او سی کے مطابق مختلف ممالک کے بین الاقوامی سفر پر مزید پابندیوں پر غور کیا گیا۔ تمام سٹیک ہولڈرز سے مشاورت کے بعد فیصلہ لیا جائے گا۔ ایس او پیز پر عمل درآمد ہفتہ آج سے پورے ملک میں نافذ ہوگا۔ شہریوں سے گزارش ہے کہ وہ ایک بار پھر معاشرتی سلوک کی اچھی مثال پیش کریں۔ اسلام آباد کے پی کے اور پنجاب کے مختلف علاقوں میں لاک ڈاؤن کا دائرہ کار بڑھانے پر غور کیا جا رہا ہے۔
اس سے قبل لاہور میں کورونا کیسز میں اضافے کے پیش نظر مزید 16 علاقوں میں سمارٹ لاک ڈاؤن نافذ کر دیا گیا۔ سیکرٹری محکمہ پرائمری اینڈ سیکنڈری ہیلتھ کیئر نے مراسلہ جاری کر دیا۔
سیکرٹری محکمہ پرائمری اینڈ سیکنڈری ہیلتھ کیئر نے مراسلے میں کہا کہ کینٹ کے 5، داتا گنج بخش ٹاؤن کے 2 علاقوں میں لاک ڈاؤن نافذ کیا گیا۔ اسی طرح نشتر ٹاؤن کے 3، سمن آباد کے 4 علاقوں میں لاک ڈاؤن لگایا گیا ہے۔ شالیمار ٹاؤن ایک، واہگہ ٹاؤن کے 2 علاقوں میں بھی سمارٹ لاک ڈاؤن نافذ ہے۔
ملک بھر میں کورونا وائزس کے بڑھنے کے بعد حکومت پنجاب نے بڑا فیصلہ کرتے ہوئے کاروباری مراکز شام 6 بجے بند کرانے کا نوٹیفکیشن جاری کر دیا۔
صوبہ پنجاب کے صوبائی دارالحکومت لاہور میں کورونا وائرس کا مسلسل بڑھتے ہوئے خطرے کے باعث حکومت پنجاب نے عوام کے تحفظ کے لیے بڑے فیصلے کر لیے، سیکرٹری پرائمری اینڈ سکینڈری کیئر نے کاروباری سرگرمیوں کے اوقات کار میں تبدیلی کر دی ہے۔
پرائمری اینڈ سکینڈری کیئر نے نوٹیفیکیشن جاری کر دیا ہے، جاری کردہ نوٹیفیکیشن کے مطابق لاہور میں کاروباری مراکزشام6بجے بند کیے جائیں گے۔ ہفتہ اور اتوار کام کرنے کی ہرگز اجازت نہیں۔
دوسری جانب نیشنل کمانڈ اینڈ آپریشن سینٹر کے تازہ ترین اعدادوشمار کے مطابق کورونا وائرس سے 46 افراد جاں بحق ہوگئے، جس کے بعد اموات کی تعداد 13 ہزار 476 ہوگئی۔ پاکستان میں کورونا کے تصدیق شدہ کیسز کی تعداد 6 لاکھ 2 ہزار 536 ہوگئی۔
گذشتہ 24 گھنٹوں کے دوران 2 ہزار 338 نئے کیسز رپورٹ ہوئے، پنجاب میں ایک لاکھ 83 ہزار 815، سندھ میں 2 لاکھ 60 ہزار 959، خیبر پختونخوا میں 75 ہزار 357، بلوچستان میں 19 ہزار 188، گلگت بلتستان میں 4 ہزار 960، اسلام آباد میں 47 ہزار 365 جبکہ آزاد کشمیر میں 10 ہزار 892 کیسز رپورٹ ہوئے۔
ملک بھر میں اب تک 94 لاکھ 45 ہزار 138 افراد کے ٹیسٹ کئے گئے، گذشتہ 24 گھنٹوں کے دوران 42 ہزار 499 نئے ٹیسٹ کئے گئے، اب تک 5 لاکھ 69 ہزار 296 مریض صحتیاب ہوچکے ہیں جبکہ ایک ہزار 720 مریضوں کی حالت تشویشناک ہے۔
پاکستان میں کورونا سے ایک دن میں 46 افراد جاں بحق ہوئے جس کے بعد وائرس سے مرنے والوں کی تعداد 13 ہزار 476 ہوگئی۔ پنجاب میں 5 ہزار 732، سندھ میں 4 ہزار 453، خیبر پختونخوا میں 2 ہزار 147، اسلام آباد میں 522، بلوچستان میں 202، گلگت بلتستان میں 103 اور آزاد کشمیر میں 317 مریض جان سے ہاتھ دھو بیٹھے۔
