مسلم لیگ (ن)کے صدر شہباز شریف نے پارٹی کے سینئر رہنماؤں کو کل لندن طلب کرلیا جہاں اہم سیاسی امور پر مشاورت کی جائے گی۔میاں شہباز شریف اس وقت اپنے بڑے بھائی اور سابق وزیراعظم میاں نواز شریف کے ساتھ لندن میں موجود ہیں جہاں نواز شریف کا علاج جاری ہے۔بدھ کو شہباز شریف نے پارٹی کے مرکزی رہنماؤں کو بھی لندن طلب کرلیا ہے۔ پارٹی ذرائع کے مطابق جنرل سیکریٹری احسن اقبال، خواجہ آصف، مریم اورنگزیب اور ایاز صادق لندن جائیں گے۔لندن میں پارٹی اجلاس کے دوران آرمی چیف کی مدت ملازمت کے لیے قانون سازی اور چیف الیکشن کمشنر کی تعیناتی سمیت دیگر معاملات پر بھی مشاورت ہوگی
