وفاقی وزیر چوہدری سالک حسین کا کہنا ہے کہ ان کی فلسطین کے لیے حمایت ہمیشہ واضح رہی ہے، وہ اقوام متحدہ میں کھڑے ہو کر فلسطین کے حق میں آواز اٹھاتے رہے ہیں، ان کا ایک کلپ کاٹ کر پراپیگنڈہ کیا جا رہا ہے۔
ایکس پر جاری اپنے بیان میں چوہدری سالک حسین نے کہا کہ ” ہمارے لیے فلسطین ہماری شہ رگ کے قریب ہے اور ہم کسی بھی جبر یا قبضے کے ساتھ کبھی نہیں کھڑے ہوئے۔ ہماری فلسطین کے لیے حمایت ہمیشہ واضح رہی ہے۔ اقوام متحدہ میں کھڑے ہو کر فلسطین کے حق میں آواز اٹھاتا رہا ہوں۔”
انہوں نے کہا کہ ایک سال پرانی تقریر کے چند سیکنڈ کاٹ کر پراپیگنڈہ کیا جا رہا ہے۔ وہ پوری دنیا کے سامنے فلسطین کا مقدمہ لڑ رہے ہیں اور لڑتے رہیں گے۔
چوہدری سالک حسین نے کہا کہ بیرون ملک مفرور بعض لوگ بھی ان کے خلاف پراپیگنڈہ مہم میں شامل ہیں لیکن وہ یہ واضح کرنا چاہتے ہیں کہ ان لوگوں کی اسرائیل کو تسلیم کرانے کی خواہش کبھی پوری نہیں ہوگی ۔
