اسلام آباد —– امیر جماعت اسلامی پنجاب ڈاکٹر طارق سلیم نے پاکستان کے 78ویں یوم تاسیس کے مو قع پر پوری قوم کو مبارکباد پیش کر تے ہو ئے کہا ہے کہ یوم آزادی ہمیں یاد دلاتا ہے کہ وطن عزیز اللہ کا خاص انعام ہے جو لاکھوں انسانوں کی قربانی کے نتیجے میں حاصل ہوا ہے، پاکستان محض ایک ملک یا زمین کا ٹکڑا نہیں بلکہ یہ علامہ اقبال، قائد اعظم اور آزادی کے لیے جہدو جہد کر نے والوں کے خوابوں کی تکمیل بھی ہے،جنہوں نے بکھری ہوئی قوم کو ایک فکر، ایک مشن اورایک نصب العین پر نہ صرف متحد کیا بلکہ اپنی ولولہ انگیز سیاسی جدوجہد کے ذریعے تاریخ کا دھارا موڑ کر ایک الگ نظریاتی ریاست کے قیام کے ناممکن سمجھے جانے والے خواب کو شرمندہ تعبیر کردکھایا، انھوں نے کہا پاکستان امت مسلمہ کی امیدوں کا مرکز ہے،پہلے قیام پاکستان کی جدوجہد تھی اور آج تکمیل پاکستان کی جدوجہد ہے جس کے لئے پھر سے قیام پاکستان جیسے ولولے اور قربانیاں درکار ہیں،پاکستان کو وجود میں لانے کا اصل مقصد اس کو اس کے حقیقی نظریے کے مطابق ڈھالنا تھا۔ان خیالات کا اظہار انھوں نے اسلام آباد میں جمعیت اتحادالعلماء پنجاب کے اجلاس سے خطاب کر تے ہو ئے کیا، اس موقع پر مولانا محمد اسماعیل، مولانا امیر عثمان اور دیگر نے بھی خطاب کیا۔
ڈاکٹر طارق سلیم نے کہاپاکستان کی مضبوطی اور اتحاد کی بنیاد اس کا نظریہ ہے اورپاکستان کی بقاء، سلامتی اور خوشحالی کا ضامن صرف اسلام نظام ہے، ہمیں وہ تمام عہد و پیماں پورے کرنے کے لیے نئے عزم کے ساتھ جدوجہد کرنا ہو گی جو قیام پاکستان کے وقت ہم نے اپنے رب سے کیے تھے، پاکستان کا اسلامی آئین ہی اس کو متحد و محفوظ رکھ سکتا ہے اور ایک نظریاتی قیادت اس کے استحکام کی ضرورت ہے،پوری قوم کوتمام تر اختلافات سے بالاتر ہو کر وطن کی ترقی کے لئے متحد ہو جانا چاہیے تاکہ علامہ اقبال کے خواب اور قائد اعظم کی انتھک جدوجہد سے حاصل پاکستان کو حقیقی معنوں میں اسلامی اورخوشحال پاکستان بنایا جا سکے،انھوں نے کہا یوم پاکستان کے موقع پر ہمیں اپنے فلسطینی و کشمیری بہن بھائیوں کی جدو جہد کو بھی فراموش نہیں کرنا چاہیئے،کشمیر پاکستان کا نامکمل ایجنڈا ہے ہم مشکل کی اس گھڑی میں فلسطینی اور کشمیری بہن بھائیوں کے شانہ بشانہ کھڑے ہیں۔
