ایران کی نئی حکومت نے امریکہ سے جوہری مذاکرات کا عندیہ دے دیا۔
غیر ملکی میڈیا کے مطابق قائم مقام ایرانی وزیر خارجہ علی باقری نے ایک انٹرویو میں روس، چین اور دیگر پڑوسی ممالک کے ساتھ تعلقات کو مضبوط بنانے کا ارادہ ظاہر کرتے ہوئے کہا کہ امریکا کے ساتھ جوہری مذاکرات کے لیے تیار ہیں۔
یاد رہے کہ 2015 میں ایران اور 6 عالمی طاقتوں کے درمیان طے پانے والے جوہری معاہدے سے امریکہ سابق صدر ڈونلڈ ٹرمپ کے دور میں دستبردار ہو گیا تھا۔تاہم دیگر ممالک برطانیہ، چین، روس، فرانس اور یورپی یونین بدستور معاہدے کا حصہ رہے اور معاہدے میں واپس لانے کے لیے امریکہ کو بھی راضی کرنے کی کوششیں کرتے رہے۔معاہدے کی بحالی کے لیے امریکہ اور تہران کے درمیان بالواسطہ مذاکرات ناکام ہوتے گئے تاہم ٹرمپ کی حکومت کے خاتمے اور پھر جوبائیڈن کے صدر بننے کے بعد سے پھر سے کوششیں شروع ہوئیں۔یہ بیک ٹو ڈور کوششیں ایرانی صدر ابراہیم رئیسی اور وزیر خارجہ کے ہیلی کاپٹر حادثے میں ہلاک ہونے کے بعد تعطل کا شکار ہوگئیں تاہم ایران میں اعتدال پرست صدر کے منتخب ہونے کے بعد دوبارہ ان کوششوں کا آغاز ہوگیا۔
