اسلام آباد —– جماعت اسلامی اسلام آباد کے تحت آج شہر بھر کے مختلف ذمہ داران کا اجلاس منعقد ہوا ، جس میں زونل ، یوسیز سمیت مختلف شعبہ جات کے ذمہ داران نے شرکت کی۔ امیر جماعت اسلامی اسلام آباد نصراللہ رندھاوا نے صدارت کی جبکہ سیکرٹری جنرل زبیر صفدر نے اجتماع عام کے حوالے سے ذمہ داریاں تعینات کیں ۔ اجلاس میں رواں ماہ منعقد ہونے اجتماع عام کے حوالے سے منصوبہ بندی عمل میں لائی گئی ۔ نوجوانوں، خواتین سمیت مختلف شعبہ ہائے زندگی کو اجتماع میں شریک کرنے اور سوشل موبلائزیشن کے ذریعے اجتماع کی دعوت اجلاس کا موضوع رہا ، علاوہ ازیں زونل و یوسی ذمہ داران نے عوامی مسائل پر بات کی۔
امیر جماعت اسلامی اسلام آباد نصراللہ رندھاوا نے اس موقع پر خطاب کرتے ہوئے کہا کہ موجودہ سیاسی نظام ملک کی خودمختاری کے لیے خطرہ بن چکا ہے ، فیوڈلز نے پاکستان کو کھوکھلا کردیا ہے ، تعلیم صحت جیسی سہولیات عام آدمی کے لیے مشکل بن چکی ہیں ۔ اب وقت آیا ہے کہ اس نظام کے خلاف علم بغاوت بلند کیا جائے ۔
امیر اسلام آباد نے کہا کہ اجتماع عام میں ظالم حکمران، کرپٹ سرمایہ دار اور جاگیرداروں سے قوم کو نجات کا لائحہ عمل دیں گے۔ پاکستان مزید تجربوں کا حامل نہیں۔ اس لیے آپ تمام ذمہ داران اپنی سطح پر عوامی ایشوز کو اجاگر کریں ، جدوجہد کریں ۔ نوجوانوں سے خصوصی رابطے کرکے اجتماع میں شریک کرائیں۔ امیر جماعت اسلامی حافظ نعیم الرحمن اور ٹیم ان شاءاللہ پاکستان کو امریکی غلاموں کے چنگل سے آزاد کرائے گی اور اس ملک میں عدل و انصاف ، شفافیت اور عام آدمی کے حقوق کی
جنگ لڑے گی۔
