اسلام آباد —-معروف سکالر و رکن قانون ساز کونسل ڈاکٹر مروان محمد ابو راس فلسطین نے وفد کے ہمراہ دفتر جماعت اسلامی اسلام آباد کا دورہ کیا ، امیر جماعت اسلامی اسلام آباد نصراللہ رندھاوا ، سیکرٹری جنرل زبیر صفدر و دیگر نے مہمانوں کو خوش آمدید کہا۔ ڈاکٹر مروان محمد ابو راس نے جماعت اسلامی کے ذمہ داران سے گفتگو کرتے ہوئے کہا کہ پاکستان اور فلسطین جسد واحد کی طرح ہیں ، اہل پاکستان نے ہمیشہ فلسطینی عوام کے حقوق کے لیے غیر معمولی آواز اٹھایا ہے ،7اکتوبر کے بعد جماعت اسلامی نے پاکستان سمیت دنیا بھر فلسطین کے لیے نہ صرف آواز اٹھائی بلکہ بڑے پیمانے پر سفارتی تعلقات کے ذریعے تعلیم ، صحت اور انفراسٹکچر کی بحالی کے لیے بھی کام کیا۔ ہم اپنے پاکستانی بھائیوں کا شکریہ ادا کرتے ہیں اور ایک آزاد فلسطین کے بعد مضبوط دوستی کے خواہاں بھی ہیں۔
امیر جماعت اسلامی نصراللہ رندھاوا نے فلسطینی وفد کی تشریف آوری کا خیر مقدم کرتے ہوئے کہا کہ پاکستان اہل فلسطین کی جدوجہد آزادی کو قدر کی نگاہ سے دیکھتے ہیں اور اپنے لیے مشعل راہ سمجھتے ہیں ۔حماس کی جدوجہد نے امت مسلمہ کو زندگی عطا کی ہے۔ جماعت اسلامی نے ہمیشہ فلسطین کاز کا ساتھ دیا ہے، قبلہ اول کی آزادی کے لیے جدوجہد ہم اپنے لیے سعادت سمجھتے ہیں۔ اسلام آباد کی عوام اپنے فلسطینی بھائیوں کے ساتھ کھڑی ہے اور ہر ممکن جدوجہد کی یقین دہانی کرتے ہیں ۔
سیکرٹری جنرل زبیر صفدر نے وفد کو جماعت اسلامی کے کام اور افرادی قوت کے حوالے سے آگاہ کیا اور اس بات کی یقین دہانی کرائی کہ جماعت اسلامی فلسطین کی بحالی کے لیے ہر ممکن تعاون کرے گی، انہوں نے مزید کہا کہ اسرائیل ایک ناجائز ریاست ہے اور حماس فلسطین کی جائز ، جمہوری اور منتخب کردہ ترجمان ہے ، ہم حماس فلسطین کے موقف کی تائید کرتے ہیں اور کسی قسم کے دوریاستی حل کو تسلیم نہیں کرتے ، ریاست ایک ہی ہے اور وہ فلسطین ہے۔
