دبئی۔پاکستان تحریک انصاف پنجاب کے نائب صدر اور ممتاز کالم نگار انجینئر افتخار چوہدری نے دبئی سے جاری اپنے تعزیتی بیان میں کہا ہے کہ سجادہ نشین دربار عالیہ گولڑہ شریف، سید مہر فرید الحق شاہ کا وصال ایک عظیم روحانی سانحہ ہے جس سے پیدا ہونے والا خلا مدتوں محسوس کیا جاتا رہے گا۔ انہوں نے کہا کہ مرحوم ایک ایسی باوقار روحانی شخصیت تھے جنہوں نے اپنی پوری زندگی دینِ اسلام کی خدمت، محبت و رواداری کے فروغ اور انسانیت کی بھلائی کے لیے وقف کیے رکھی۔
انہوں نے کہا کہ سید مہر فرید الحق شاہ کی ذات علم و عمل کا حسین امتزاج تھی۔ ان کی محفلیں ذکرِ الٰہی، اصلاحِ نفس اور اخلاص و محبت کا مرکز ہوا کرتی تھیں، جہاں ہر آنے والا سکونِ قلب پاتا اور رہنمائی حاصل کرتا تھا۔ ان کا طرزِ زندگی سادگی، عاجزی اور خلوص سے بھرپور تھا، جو انہیں دیگر شخصیات سے ممتاز بناتا تھا۔
انجینئر افتخار چوہدری نے اپنی ذاتی یادوں کا ذکر کرتے ہوئے کہا کہ یہ ان کے لیے باعثِ فخر و سعادت ہے کہ سید مہر فرید الحق شاہ نے ان کی جدہ میں واقع رہائش گاہ پر تشریف لا کر انہیں عزت بخشی۔ انہوں نے کہا کہ یہ لمحہ ان کی زندگی کے یادگار ترین لمحات میں سے ایک ہے، جو ہمیشہ ان کے دل میں زندہ رہے گا اور مرحوم کی محبت و شفقت کی ایک روشن یاد کے طور پر باقی رہے گا۔
انہوں نے مزید کہا کہ سید مہر فرید الحق شاہ نے نہ صرف اپنے اسلاف کی روحانی روایات کو زندہ رکھا بلکہ انہیں جدید دور کے تقاضوں کے مطابق آگے بڑھایا، اور ہزاروں عقیدت مندوں کی زندگیوں میں مثبت تبدیلی لانے کا ذریعہ بنے۔ ان کا فیض اور ان کی تعلیمات ہمیشہ لوگوں کے دلوں میں زندہ رہیں گی۔
آخر میں انجینئر افتخار چوہدری نے دعا کی کہ اللہ تعالیٰ مرحوم کے درجات بلند فرمائے، ان کی مغفرت فرمائے، ان کی قبر کو نور سے بھر دے اور انہیں جنت الفردوس میں اعلیٰ مقام عطا فرمائے۔ انہوں نے لواحقین، مریدین اور تمام عقیدت مندوں کے لیے صبرِ جمیل کی دعا کرتے ہوئے کہا کہ وہ اس دکھ کی گھڑی میں ان کے غم میں برابر کے شریک ہیں۔
