وفاقی وزیرداخلہ محسن نقوی سے برطانوی نائب وزیر خارجہ برائے پاکستان و افغانستان ہمیش فالکنر نے ملاقات کی۔ جس میں باہمی دلچسپی کے امور اور پاک برطانیہ تعلقات پر تبادلہ خیال کیا گیا۔ ملاقات میں دوطرفہ تعلقات کے فروغ کے لئے مشترکہ اقدامات پر بھی گفتگو کی گئی۔ وفاقی وزیرداخلہ محسن نقوی نے برطانیہ کے نائب وزیر خارجہ ہمیش فالکنر کے لئے نیک خواہشات کااظہار کیا۔وزیر داخلہ نے پاک برطانیہ تعلقات کو مزید مستحکم بنانے کے عزم کا اعادہ کیا۔ ملاقات میں پاکستان اور برطانیہ کے درمیان وسیع تر دوطرفہ و علاقائی امور پر مضبوط ہم آہنگی کی ضرورت پر زور دیا گیا۔وفاقی وزیرداخلہ محسن نقوی نے کہا کہ برطانیہ پاکستان کا مضبوط اور بہترین دوست ملک ہے، وقت آگیا ہے کہ باہمی تعاون کو پائیدار اقتصادی پارٹنر شپ میں تبدیل کیا جائے۔
انہوں نے کہا کہ آپ کے دورہ پاکستان سے دوطرفہ تعلقات میں مزید گرم جوشی آئے گی۔ وفاقی وزیرداخلہ محسن نقوی نے اس بات پر زور دیا کہ سوشل میڈیا پر بے بنیاد اور گمراہ کن افواہیں پھیلانے اور پروپیگنڈا کرنے کے خلاف مشترکہ اقدامات اٹھانے کی ضرورت ہے۔ وفاقی وزیر داخلہ نے کہا کہ پاکستان میں اقلیتوں کو تمام تر حقوق حاصل ہیں، اقلیتی برادریوں کا تحفظ ہماری اولین ترجیح ہے۔برطانوی ہائی کمشنر جین میریٹ اور برطانیہ میں پاکستان کے ہائی کمشنر ڈاکٹر محمد فیصل بھی اس موقع پر موجود تھے۔
