وفاقی بیوروکریسی کےگریڈ 20 اور 21 میں ترقی کے منتظر افسران کیلئے مایوسی کی خبر ہے کہ وفاقی حکومت نے افسران کی گریڈ 20 اور 21 میں ترقی کیلئے شیڈول سنٹرل سلیکشن بورڈ اجلاس ایک بار پھر غیر معینہ مدت کے لئے ملتوی کر دیا .بورڈ اجلاس 23 سے 27 دسمبر تک شیڈول تھا۔ قبل ازیں گزشتہ ماہ نومبر میں شیڈول اجلاس بھی مؤخر کیا گیا تھا، وزیراعظم نے گزشتہ روز سنٹرل سلیکشن بورڈ کی تشکیل کی منظوری دی تھی۔ سنٹرل سلیکشن بورڈ کا اجلاس تمام سروسز، گروپس، ایکس کیڈر کے ایک ہزار افسران کو گریڈ 20 اور21 میں ترقی دے گا۔ بورڈ اجلاس نہ ہونے کے باعث ا یک ہزارسے زائد افسران کی ترقی ایک سال 4 ماہ سے زیرِ التواء ہے۔ بورڈ کا اخری اجلاس اگست 2023میں ہوا تھا۔ یاد رہے کہ پرو موشن پالیسی کے مطابق سینٹرل سلیکشن بورڈ اجلاس سال میں 2 مرتبہ منعقد ہونا چاہئے۔ تاخیر کے باعث ترقی کے منتظر افسران مایوسی اور اضطراب کا شکار ہیں۔ اسٹیبلشمنٹ ڈویژن کے ذرائع کا کہنا ہے کہ سنٹرل سلیکشن بورڈ کا اجلاس ہائی پاور سلیکشن بورڈ کے بعد ہوگا۔ہائی پاور سلیکشن بورڈ گریڈ اکیس کے افسروں کو گریڈ بائیس میں ترقی دے گا۔۔ اسٹیبلشمنٹ ڈویژن نے بورڈ اجلاس کی غیر معینہ مدت کے لئے ملتوی ہونے کاباضابطہ نوٹیفیکیشن جاری کر دیا ۔
