پاکستان مسلم لیگ ضیاء شہید کے صدراورسابق وفاقی وزیرمذہبی امورمحمد اعجاز الحق نے کہا ہے کہ پیپلزپارٹی کے شرپسند کارکنوں کی جانب سے فیصل مسجد کے احاطے میں واقع سابق صدراورآرمی چیف جنرل ضیاء الحق شہید کے مزار کی بے حرمتی ان کے غیر مہذب ہونے کا ثبوت ہے یہ مذمو م اورگنداواقعہ باقاعدہ منصوبہ بندی اور پیپلز پارٹی کے چیئرمین بلاول بھٹو اور آصف زرداری کی ایماء پر کیا گیا ہے یہ سانحہ موجودہ حکومت اور اسلام آباد کی ضلعی انتظامیہ کی ناکامی اور غفلت کا نتیجہ ہے واقعہ سے ضیاء الحق کے چاہنے والوں کی دل آزاری ہوئی ہے اس شرمناک واقعہ کی جتنی بھی مذمت کی جائے کم ہے اس واقعہ سے حکومت اور پاکستان کی دنیا بھر میں جگ ہنسائی ہوئی ہے مطالبہ کرتے ہیں کہ پاک فوج اپنے آرمی چیف کے مزار کی بے حرمتی کا نوٹس لے حکومت واقعہ کا نوٹس لیتے ہوئے واقعہ میں ملوث تمام افراد کو کیفر کردار تک پہنچائے نیشنل پریس کلب اسلام آباد میں ایک ہنگامی پریس کانفرنس کرتے ہوئے انہوں نے کہاکہ گزشتہ شب سندھ سے آنے والے پیپلز پارٹی کے شر پسندوں نے شہید ضیاء الحق کے مزار کی بے حرمتی کی ہے، یہ سانحہ بلاول بھٹو اور آصف علی زرداری کی کہنے پر سرانجام دیا گیا ہے،شہید ضیاء الحق کے مزار کی بے حرمتی کر نے والون کے خلاف کاروائی نہ کی گئی تو دیگرشہداکے مزاروں کی بھی بے حرمتی کے واقعات رونماہوسکتے ہیں وزیراعظم اور وزیر داخلہ کی جانب سے فون آئے کہ ہم نے پولیس کو مزارات کی نگرانی کیلئے ہدایات جاری کردی ہیں آئندہ ایسا نہیں ہوگا انہوں نے مطالبہ کیا کہ بلاول بھٹو اور آصف زرداری کے خلاف بے حرمتی کے حوالے سے ایف آئی آر درج ہونی چاہیے اور واقعہ پربلاول اور زردادی کو معافی مانگنی چاہیے جن لوگوں نے مزار کی بے حرمتی کی وہ ان ہی کی گاڑیوں میں بیٹھ کر آئے وہ مزار تک پہنچے اور نازیبا نعرہ بازی کی،ہم شہید ضیاء الحق کے مزار کی بے حرمتی کی شدید الفاظ میں مذمت کرتے ہیں عوام اس سانحہ کے بارے میں سوال پوچھ رہی ہے حکومت سے مطالبہ کرتے ہیں کہ اس سانحہ کی تحقیقا ت کروائی جائے اور انکو جلد سے جلد کیفر کردار تک پہنچایا جائے، اعجاز الحق نے مزید کہا کہ سندھ سے آئی 80 فیصد گاڑیاں چوری کی تھی جنہیں وہ پنجاب میں چھوڑ گئے ہیں لانگ مارچ میں 30 ہزارروپے فی کس دیہاڑی پر غریبوں کو سندھ سے لایا گیا جن کے کھانے، رہائش اور گاڑیوں کا انتظام سرکار ی وسائل سے کیا گیا تھا انہوں نے کہاکہ لانگ مارچ کرنے والے لوگوں سے ملک نہیں چلنا یہ افراتفری میں لگے ہوئے ہیں انکے خلاف کیسز سامنے آرہے ہیں ایک سوال کے جواب میں کہاکہ یہ تحریک عدم اعتماد کسی صورت کامیاب نہیں ہوسکتی کیونکہ یہ ایک دوسرے کے کندھو ں پر رکھ کر فائر کررہے ہیں آصف علی زرداری نے اپنی پارٹی کو پی ڈی ایم سے اس لیے علیحدہ کیا کہ مجھے این آر او مل جائے لیکن یہ اس میں کامیاب نہیں ہوں گے۔
