قومی ایئر لائن میں اصلاحات اور احتساب کی جاری کارروائیوں کے تحت پی آئی اے نے ستمبر کے مہینے میں 54 ملازمین کے خلاف ایکشن لیا ہے۔ ترجمان پی آئی اے عبداللہ خان کی طرف سے جمعہ کو یہاں جاری اعلامیہ کے مطابق پی آئی اے کے شعبہ ہیومن ریسورس نے ملازمین کے خلاف کی جانے والی کارروائی کی فہرست جاری کر دی ہے۔جعلی تعلیمی اسناد کے حامل 07 ملازمین کو ملازمت سے برطرف کر دیا ہے۔ ترجمان نے بتایا کہ بغیر اطلاع کے طویل عرصہ سے غیر حاضر 08 ملازمین کے نام بھی اس فہرست میں شامل ہیں جنہیں ملازمت سے فارغ کر دیا گیا ہے۔ اس فہرست میں کمپنی کے اثاثہ جات کو نقصان پہنچانے پر برطرف کئے گئے 02 ملازمین کے نام بھی شامل ہیں جبکہ سرکاری معلومات کو غیر قانونی طور پر افشا کرنے پر بھی ایک اہلکار کو برطرف کیا گیا ہے۔
ترجمان پی آئی اے نے بتایاکہ بدعنوانی اور غبن میں ملوث چھ ملازمین کو بھی ملازمتوں سے برخاست کر دیا جبکہ دو اہلکار جو منشیات کی نقل و حمل اور سمگلنگ میں ملوث تھے انہیں بھی برطرف کر دیا گیا ہے۔ سرکاری دستاویزات کی چوری اور ریکارڈ کو نقصان پہنچانے میں ملوث دو ملازمین اورکام سے انکار پر ایک ملازم کو بر طرف کر دیا گیا ہے۔ ترجمان نے بتایا کہ ایس او پیز کی خلاف ورزی کر نے والے پانچ ملازمین کی بطور سزا انکریمنٹ میں کٹوتی بھی عمل میں لائی گئی ہے جبکہ احکامات کے مطابق عمل نہ کرنے پر 09 ملازمین کی تنزلی کر دی گئی ہے۔
ترجمان نے بتایا کہ دس ملازمین ضابطے کی کاروائی کے بعد بے قصور پائے گئے ہیں جبکہ پی آئی اے نے اچھی کارکردگی کے حامل 13 ملازمین کو تعریفی اسناد بھی جاری کی ہیں جبکہ 07 ملازمین کو نقد انعامات سے بھی نوازا گیا ہے۔ ترجمان پی آئی اے نے کہا کہ یہ تمام کارروائیاں قانون اور ضابطے کے قواعد پورے کرتے ہوئے عمل میں لائی گئی ہیں۔ پی آئی اے میں بغیر کسی دبائوکے سزا وجزا کا عمل جاری ہے اور جاری رہے گا۔
