راشن فارمولیشن کی سہولت کیلئے ورچوئل تقریب رونمائی ہوئی
انڈسٹریل ڈیویلپنگ پروگرام کیلئے عالمی ایجنسیوں کے ساتھ مزید اشتراک کی ضرورت ہے : ڈاکٹر فتح اللہ خان
کسانوں اور لائیو سٹاک فارم آپریشنز کے دوران ’’راشن فارمولیشن‘‘ کی سہولت کیلئے ’’پاکستان فیڈ سٹفس ڈیٹا بیس‘‘ کے عنوان سے کتابچہ شائع کر دیا گیا ۔کتابچہ لائیو سٹاک اینڈ ڈیری ڈویلپمنٹ بورڈ نے یو ایس ایڈ پاکستان اور یونیورسٹی آف ویٹرنری اینڈ اینمل سائنس کے تعاون سے شائع کیا ہے۔ ورچوئل تقریب رونمائی لائیو سٹاک اینڈ ڈیر ڈویلپمنٹ بورڈ ہیڈکوارٹر میں منعقد ہوئی ۔تقریب میں چیف ایگزیکٹیو آفیسر لائیو سٹاک ڈیری ڈویلپمنٹ بورڈ ڈاکٹر فتح اللہ خان اور یو ایس ایڈ پاکستان کے ڈائریکٹر اکنامک گروتھ اینڈ ایگریکلچر مارک ٹیگن فیلڈٹ بطو ر مہمان خصوصی شریک ہوئے۔ تقریب رونمائی سے خطاب کرتے ہوئے ڈاکٹر فتح اللہ نے کہا پاکستان فیڈ سٹف ڈیٹا بیس کی تکمیل سے لائیو سٹاک انڈسڑی کو کئی فوائد حاصل ہوں گے ۔ پاکستان کے لائیو سٹاک کے شعبے میں یو ایس ایڈ پاکستان، دیگر عالمی ایجنسیوں اور لائیو سٹاک ڈیری ڈویلپمنٹ بورڈ کے مابین اشتراک کو مزید تقویت دینے کی ضرورت ہے تا کہ پاکستانی لائیو سٹاک سیکٹر کے انڈسٹریل ڈویلپنگ پروگرام میں مزید بہتری لائی جا سکے۔ تقریب سے خطاب کرتے ہوئے اینمل ہسبینڈری کمشنر ڈاکٹر خورشید احمد نے کہا کہ پاکستانی حکومت لائیو سٹاک بریڈ میں بہتری کے لیے ’’ایمبریو ٹرانسفر‘‘ کے وژن پر کام کر رہی ہے پاکستان کو ایس پی ایس ایشوز پر پیش رفت کی ضرورت ہے تا کہ ملک میں لائیو سٹاک پراڈکٹس کے دائرہ کار کو وسیع تر کیا جا سکے۔تقریب میں پاکستان ایگریکلچر ریسرچ کونسل کے سینیئر افسران، پروگریسو فارمرز، پبلک پرائیویٹ سیکٹر ،فیڈ مینوفیکچررز اور لائیو اسٹاک سے متعلقہ شعبوں سے تعلق رکھنے والے افراد بھی ویڈیو لنک کے ذریعے شریک ہوئے۔ پاکستان فیڈ سٹفس ڈیٹابیس 70 کی دہائی کے بعد پہلی مکمل ریسرچ ہے جو مقامی سطح پر موجود خام مال اور اس سے اعلی کوالٹی کی سستی اور معیاری فیڈ کی تیاری سے متعلق معلومات پر مشتمل ہے۔
